UCLA Liwanag at Dilim 2010 (Benevolence)

ni Ezra Biado

Mga Sagot ni  Rosalina V. Idos

1. Maari po bang magbigay kayo ng ilang tala tungkol sa inyong sarili at sa pagtuturo ninyo ng wikang Filipino/Tagalog?

Ako ay isang guro, propesor, manunulat ng kurikulum, tagapagsanay ng mga guro sa pagtuturo ng wikang banyaga, at masugid na tagataguyod ng pagtuturo ng Filipino.

Ako ay nagtapos ng Bachelor of Science (Magna cum Laude) at Master of Science in Education sa University of the East sa Pilipinas at Master of Arts in Education sa National University dito sa San Diego, California.

Ako ang nagsimula ng unang klase  sa Filipino sa Morse High School sa San Diego Unified School District bilang sagot sa hiling ng mga magulang at komunidad na magbukas ng klase sa Filipino. Ineskedyul ang klaseng ito sa 6:30 ng umaga. Labindalawang estudiyante lamang ang nagtapos ng unang klaseng ito noong taong 1989. Sa mga sumusunod na taon dumami nang dumami ang mga estudiyanteng pumasok sa Pilipino kaya’t sumulat naman ako ng mga kurikulum sa Filipino 1-2, 3-4, 5-6, 7-8, at ng Filipino Honors Program para masagot ang pangangailangan ng mga estudiyante. Sa ngayon ay may 10 klase na ng Filipino sa Morse High School at may 65 klase ng Filipino  sa San Diego. Ito ay magmulang middle school, hayskul, community school at unibersidad.

Noong  nagkaroon ng krises ang mga klase ng Filipino dahil sa batas na New Child Left Behind na nagsasaad na ang lahat ng guro na nagtuturo ng Fiipino ay dapat magkaroon ng lesensya sa pagtuturo ng Filipino, ako ang naatasan ng Commission on Teacher Credentialing ng California ang mamuno ng lupon na gagawa ng eksamin na dapat ipasa ng mga guro para maipagpatuloy nila ang pagtuturo ng Filipino. Noong taong 2007 nagawa namin ang eksaming ito na kinuha at ipinasa ng mga guro ng Filipino.  At dahil sa eksaming ito ng Filipino na aking pinamunuang gawin, ang ibang less commonly taught languages ay nagkaroon na rin ng eksamin na ang ginagamit na modelo ay iyong ginawa namin.

2. Kailan po kayo nagsimulang nagturo at anu-ano ang mga klase o kursong itinuro/ itinuturo ninyo?

Nagsimula akong magturo noong taong 1965 sa isang hayskul, at kinuha  akong propesora  sa University of the East. Nagtagal ako doon ng 20 taon hanggang sa umalis kami patungong Estados Unidos. Ang mga itinuro ko sa hayskul ay Inglis at History. Sa unibersidad ang itinuro ko ay Inglis. Dito sa Estados Unidos, 22 taon akong nagturo sa Morse High School ng History, Economics, Government, at Filipino. Adjunct professor din ako sa Alliant International University dito sa San Diego at nagtuturo ako ng Methods of Teaching. Noong Hunyo, 2009, nagretiro na ako sa pagtuturo sa hayskul ngunit patuloy pa rin akong tinatawag ng school district para gumawa ng curriculum at assessment sa mga klase ng Filipino.

3. Gaano po kalalaki ang klase?  Ilan ang estudyante sa bawat klase?

Ang bawat klase ko ay kadalasan umaabot ng mga 35. Limang piryud na tig-iisang oras sa isang araw ako nagtuturo ng Filipino.

4. Gaano na katagal po kayong nagtuturo ng Filipino?

20 taon na.

5. Ano po ang inyong panuntunan o pedagogy sa pagtutura ng wikang Filipino?

Communicative-based instruction ang panuntunan ko sa pagtuturo ng Filipino.  Ang ibig sabihin ay tinuturuan ko ang mga estudiyante ko kung paano, at kaylan nila gagamitin ang wika. Tinuturuan ko rin silang isaalang-alang kung sino ang kanilang kinakausap at kung ano ang sitwasyon ng kanilang pag-uusap. Sa madaling salita, ang wika ay itinuturo na kaalinsabay ng kultura.

6. Ano po ang binibigyang-diin ninyo sa klase?

Sa simula pa lamang ng semestre o taon, binibigyang diin ko na sa aking mga estudiyante na kailangang maniwala sila sa tatlong bagay: una na mahalaga ang kanilang pag-aaral ng Filipino ; pangalawa, kayang-kaya nila ito; at pangatlo, hindi ko sila pababayaan at lagi akong handang tumulong sa kanila sa pag-aaral ng Filipino.

7. Sa kasalukuyang umiiral na budget cuts, ano naman po ang lagay ng pagtuturo ng wikang Filipino sa inyong lugar o paaralan?

Sa awa ng Diyos, wala namang masyadong epekto sa mga klaseng Filipino ang budget cuts. Ang ibig sabihin, hindi mawawala ang Filipino hangga’t mayroong mga mag-iinrol sa mga klaseng ito. Sa Morse High School nga, nadagdagan pa ng dalawang klase ang Filipino ngayong taong ito.

8. Ano po sa palagay ninyo ang hinaharap ng pagtuturo ng wikang Filipino sa inyong paaralan at sa Estados Unidos?

Malaki ang hinaharap ng pagtuturo ng Filipino sa aming paaralan, sa buong San Diego, sa buong California,  sa Estados Unidos, at maging sa buong mundo.  Ito ay sa dahilang ang mga Pilipino ay matatagpuan kahit saang sulok ng Amerika at sa buong mundo. Sinasabing mayroon ng mga 10 milyong Pilipino na nakatira sa labas ng Pilipinas at ayon sa Commission on Overseas Filipinos, matatagpuan sila sa may 239 na mga bansa sa mundo.  Malaki ang pagnanasa ng mga Pilipinong ito na nakatira sa labas ng Pilipinas na matututo ang kanilang mga anak ng wika at kulturang Pilipino.

Ito ang isang malaking dahilan kung bakit kaming mga guro ng Filipino dito sa San Diego ay nagtatag ng Council for the Teaching of Filipino Language and Culture (CTFLC), kung saan ako tumatayong Pangulo. Ito ay isang kapisanan ng mga guro at mga taga-tangkilik ng Filipino na ang layunin ay para patuloy na maisulong ang pagtuturo ng Filipino para sa kapakanan ng ating mga kabataang Pilipino na nagsasabi na dahil sa mga klaseng Filipino ay naramdaman at nadama nila ang pansariling pagpapakilanlan. At para naman doon sa mga estudiyante na hindi Pilipino, ang klase ng Filipino ay nagbibigay sa kanila ng pagkakataong matuto ng isa pang wika at kultura.

Dahi sa malaki ang paniniwala ko na maganda ang hinaharap ng pagtuturo ng wikang Pilipino ang aming kapisanan ang nagtatag at nagpalakad ng 2^nd International Conference on Filipino as a Global Language na ginanap dito sa San Diego. Ito ay dinaluhan ng may 200 delegado na galing sa iba’t ibang lugar sa mundo na binubuo ng mga guro, propesor, estudiyante, at kapanalig sa komunidad. Lalo kong napatunayan na malaki ang pag-asa natin      na matagumpay na maisulong ang pagtuturo ng Filipino kahit saan. Sa katunayan naimbitahan kami ng World Council on Curriculum and Instruction na pumunta sa kanilang kumperensya sa Hungary ngayong Hulyo para ibahagi sa mga delegado na galing sa iba’t-ibang bansa kung paano napagtagumpayan namin sa San Diego ang pagtuturo ng wikang Filipino at kung papaano ito maituturo rin sa ibang bansa batay sa huwaran na aming nagawa sa San Diego.